ଭଦ୍ରକ ଜିଲ୍ଲାରେ ନିର୍ବାଚନ କାର୍ଯ୍ୟରେ ଅବହେଳା ଅଭିଯୋଗରେ ଜଣେ ବୁଥ୍ ସ୍ତରୀୟ ଅଧିକାରୀ (ବିଏଲଓ) ଙ୍କୁ ନିଲମ୍ବନ କରାଯାଇଛି। ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଦିଲୀପ ରାଉତରାୟ, ପିଏସଏସ ନୋଡାଲ ହାଇସ୍କୁଲ ଚନ୍ଦ୍ରକଟା ବିନ୍ଧାର ସହକାରୀ ଶିକ୍ଷକ ସପନ କୁମାର ନାୟକଙ୍କୁ ସ୍ୱତନ୍ତ୍ର ତୀବ୍ର ସଂଶୋଧନ (SIR)-2026 ସମୟରେ କର୍ତ୍ତବ୍ୟରେ ଗୁରୁତର ଅବହେଳା କରିଥିବାରୁ ତୁରନ୍ତ ପ୍ରଭାବରୁ ନିଲମ୍ବିତ କରିଛନ୍ତି।
ସପନ କୁମାର ନାୟକ ଚାନ୍ଦବାଲି ବିଧାନସଭା ନିର୍ବାଚନମଣ୍ଡଳୀ ଅଧୀନ ମାଲପୁରର ବୁଥ୍ ନମ୍ବର–୨୯ ପାଇଁ ବିଏଲଓ ଭାବେ ନିଯୁକ୍ତ ଥିଲେ। ଅଭିଯୋଗ ଅନୁଯାୟୀ, ସେ ଇଆରଓ-ନେଟ୍ ପ୍ଲାଟଫର୍ମରେ ପଞ୍ଜୀକରଣ ଓ ବିଏଲଓ ଆପ୍ ସକ୍ରିୟ କରିବା ପାଇଁ ଆବଶ୍ୟକ ପିଆଇସି ବିବରଣୀ ଏବଂ ଓଟିପି ପ୍ରଦାନ କରିନଥିଲେ। ଫଳରେ ଭୋଟର ତାଲିକା ସଂଶୋଧନ କାର୍ଯ୍ୟ ପ୍ରଭାବିତ ହୋଇଥିଲା।
ଜିଲ୍ଲା ପ୍ରଶାସନ ପକ୍ଷରୁ ବାରମ୍ବାର ନିର୍ଦ୍ଦେଶ ଏବଂ କାରଣ ଦର୍ଶାଅ ନୋଟିସ ଜାରି କରାଯାଇଥିଲେ ମଧ୍ୟ ସପନ କୁମାର ନାୟକ ସହଯୋଗ କରିନଥିବା ଅଭିଯୋଗ ହୋଇଛି। ଏହା ଫଳରେ ସ୍ୱତନ୍ତ୍ର ତୀବ୍ର ସଂଶୋଧନ (SIR)-2026 ପ୍ରକ୍ରିୟାରେ ବାଧା ସୃଷ୍ଟି ହୋଇଥିଲା। ପ୍ରଶାସନ ଏହାକୁ ଗୁରୁତର ଅବହେଳା ବୋଲି ବିବେଚନା କରି କାର୍ଯ୍ୟାନୁଷ୍ଠାନ ନେଇଛି।
ଜିଲ୍ଲାପାଳଙ୍କ ଆଦେଶ ଅନୁଯାୟୀ, ନିଲମ୍ବନ ଅବଧିରେ ସପନ କୁମାର ନାୟକଙ୍କ ମୁଖ୍ୟାଳୟ ଭଦ୍ରକ ଜିଲ୍ଲା ଶିକ୍ଷା କାର୍ଯ୍ୟାଳୟରେ ରହିବ। ପୂର୍ବ ଅନୁମତି ବିନା ସେ ମୁଖ୍ୟାଳୟ ଛାଡ଼ି ଯାଇପାରିବେ ନାହିଁ। ପ୍ରଶାସନ ସ୍ପଷ୍ଟ କରିଛି ଯେ ନିର୍ବାଚନ କାର୍ଯ୍ୟରେ ଅବହେଳା ଓ ଅସହଯୋଗ କୌଣସି ପରିସ୍ଥିତିରେ ସହ୍ୟ କରାଯିବ ନାହିଁ।